De Toitzen habent gaprochet de konfiine on saint khent büar. De kanüüne habansich gahorrt siissan saldo mèeront nagane, on an gròosa granata bon 305 ist passàrt übar Toballe on ist gant ballan nàgane me Baitofe. Lora, dorkhlupfet nòch mèeront, de loite, manne un baibar, habent bohénne galet ‘s glaplettarach ba hatten gapréart, un in de sékhe on in gròose zòan, on éppasen zo ghèssan òch. Dii ba habent nèt gahat an ross odar an müll zo ziigan in karett mettar faméjen on ‘s gaplèttarach obarndrau, habent gahat de khüü zo bèttan untar in baaghen met vìar ròdeln. Hinten habantza gapuntet de gòas on antia an öba.
Mèeront odar òona faméja habent gazooghet in karett sèlbort. Oona bon disen de Jakomina Marela, de muutar dar Serafiin, bittoba met seks khindar, alle nòch junkh.
(…) Bénne bar sainan partiart lassanten dà alles, de ufficieele habantsich khöt ke bar steenan dehiin an mintzich taghe anlòan. (...) Brandare haban gahat in müll me main prùdare Toni. Au in karett hatze galéghet noch halben sakh zükharn, ma dénne hatzen gazooghet abar on gatraghet nòch in de botéga zo machan posten àname baibe ba hat net gamöcht ghenan anlòan. Asò au in karett saibar gasòtzet brandare drai diirnlen, Maria, Tanti, Gusti , de éltarste sbestar Luigia, de muutar, ditzan baip on dar main pruudar, in siban loite. Nach me béghe sainbarsich fermaart kan Ciénne, Visènz, on denne haabar gamöcht gheenan fintzamài me Komaune bon Pojana Maggiore, nagane Noventa on Montagnana.
Dar Komaun hat ghèt in sussidien büüzkh skèi in gròosen loiten un viarzkh in khlòan. Bor an maanont haabar gaslaafet au in an langa dilla; bor pétte an mintzich stròa, bia ‘s Khint bon Betlemme, on dà in deniidar. Bar haban gamacht èssan ausont on, benne ‘s garéghent, haabar gamöcht nützan de ombrèla.
(…) De loite bon dén lèntarn habansich net gasècht ghèerne, fontamài se habansich net gakhant, on ambrumme d’ügnar éltarsten loite habent saldo gaprechtet in cimbro, habantza gamòant bar sàinan toitze odar spiüüne, on se habent khöt ke baràndare stinkhabar bon pèche. Bar sainan khent garüüfet “profughi”: bettan òrndar naamo, nìa gahòrt!
Sainta gabeest müütare ba, benne de khindar habantze gamacht gheenan zòrnikh, hàbanten khöt: “Machet de guuten, ad’ar net béllt ‘s de profughi tràganach dehiin!”
Costantina Zotti Tanti “Mezzaselva - Kan Toballe”
