Poesie

Maine kindar bibel bassar

Habanten gasecht Venedighe bor de erste botta, de Nena Tuuta, an altes baip bon Toballe, kearanten  hoam, seelt au sonname Khutten diarn alles bas ze hat gasecht in de drai taghe ba ze ist gabest da.
  
Maine diarn ar soltet segan biibel bassar ista da.
bran de hoisarn, naach in beghen untar prukken, alle ba.
 
Holzar raitent au un abe,
padarnach zobia pa taghe,
 
gasoopet borran met langhen saufeln,
bail de stat gheet in taufen.
 
De ganze stat suttet bassar  un kloas ba sopfet au:
bia tuunt alle de zain hoizar noch bolaiban au kastau?
 
Bomme  meere dar zain bint,
hortan spilt zobia an khint.
 
Bool un sbear leghet-ach aan,
Pintet idar  de oarn marslaan.
 
Gassin ka Venedighe un iart och khlaaghet,
Benne ar  zeghet de stat azo dorbaaghet.
 
As  ze , in minsich saite, ist net dortrunkhet,
Is-ze ich bortemich, tiif dorsluntet.
 
And ich, alta sorka, bin net gabeelt,
De taghe bon Venedighe  zaint gaseelt.
 
Un bas khodan zain mannen, ba raitent un hortan habent presse?
Ze zolten gheban zich so tuunan: haltan de stat haus bon dear nesse!
 
Ze prottent saldo bia sobel encghele,
un andarsi zeinta groose penghele.
 
Han gasecht in San Marken un de sain taupen:
pittabar alle az  se net gheen in haufen.
 
Un bas kodan och bon enghen begalen
ba seinta khoone moto-begalen?
 
Naach in ersten ba trettent alle
de Venedigar ruufent kalle.
 
Ba loitet  punkentbon alla zaite
Un ista khoas ba tuut babaite?
 
So lassan net Venedighe aso orran
Alla de belt solt khemmanar borran,
 
so holfan  de stat zoibaran au,
bon berre, ghebent betze manne un brau:
 
ghebabar  och bandare, bail bar zein resse,
an hant so  trukhanan alla doi nesse.

 

Umberto Martello Martalar

Submit to FacebookSubmit to Google PlusSubmit to TwitterSubmit to LinkedIn

ISTITUTO DI CULTURA CIMBRA
“Agostino Dal Pozzo”

via Romeo Sartori, 20
36010 ROANA (Vicenza)
Email: cimbri7comuni@gmail.com

‘S HAUS DAR TZIMBRISEN BISSEKHOT
“Agustin Prunnar”

Romeo Sartori bèg, 20
36010 ROBAAN (Viséntz)

Questo sito o gli strumenti terzi da questo utilizzati si avvalgono di cookie. Usando il nostro servizio accetti l'impiego di cookie in accordo con la nostra cookie policy. Cookie Policy